Pale toe! In hierdie boek skryf die veteraan-rugbyskrywer Michael Green, nes in sy vorige boek Stryd van die Reuse, oor ’n klomp wonderlike karakters wat deur die jare hul talente op die rugbyveld uitgestal het. Dis nou manne soos Kwagga Smith, Beast Mtawarira, Percy Montgomery, Chester Williams en prins Alexander Obolensky, om maar net ’n paar te noem. Green vertel ook van sy eie avonture in die rugbywêreld, soos van die dag toe die voormalige Springbokkaptein Joost van der Westhuizen hom dik wou tik. En hoe hy as kind die Springbokslot Moaner van Heerden in ’n inkopiesentrum agtervolg en geteister het. Green skryf ook oor die dag toe ’n dorp se drank opgeraak het ná ’n onverwagte sege teen die All Blacks en oor die Stellenbosch-kroegspan se omstrede rugbytoer waar die dronk spelers graag “Springhaas-springhaas” gespeel het. Dis nie jou alledaagse rugbyboek nie, dis ’n rugby-rondomtalie wat jou kan laat lag, huil en ril van lekkerkry!  

In Stryd van die reuse vertel die gesoute rugbyskrywer Michael Green ‘n klompie rugbystories op sy eiesoortige manier – ware staaltjies uit sy loopbaan by Die Burger, Die Son, Beeld en elders. Pittig, snaaks, pragtig geskryf, uniek!